უნიკალური სასმელები და კერძები მუნიციპალიტეტში

კახური მწვადი - მისი შეწვა ხდება ვაზის წალამზე, რაც განსაკუთრებულ არომატს სძენს მწვადს.

დამბალხაჭო – ტრადიციული ფშაური კერძია. მზადდება კარაქის შედღვების შემდეგ დარჩენილი დოს ხაჭოსაგან. მარილში გადაზელილ ხაჭოს კვერებს რამოდენიმე დღე უმზეოდ აშრობენ წნელისაგან მოწნულ სპეციალურ სათავსოში – ძობანში, რომელიც ხშირად შუაცეცხლის თავზე ამავალ ბოლზე ჰკიდია. გამშრალ ხაჭოს კვერებს დასალბობად ალაგებენ თიხის ქოთანში.ჰერმეტულობის და მუდმივიტემპერატურის შესანარჩუნებლად ქოთანი შეიძლება მიწაში იყოს დაფლული. ასე ლბება ხაჭოს კვერები დაახლოებით 1,5-2 თვის განმავლობაში. ლბობის პროცესში გარედან იკიდებს “კეთილშობილ ობს” რომელიც გემრილიცაა და სასარგებლოც.

ხინკალი - შედგება ღორისა და საქონლის (ან ცხვრის) ხორცის ნარევისგან. წარმოადგენს ცომისგან დამზადებულ ერთგვარ ტომარას, რომელშიც მოთავსებულია გატარებული ხორცი. მზადდება ხარშვის წესით.

ჯიჯიგ-გალნიშ(ქისტური დელიკატესი) მზადდება ხორცისგან და ცომისგან.

ალუდი -  ალუდი რიტუალური წმინდა სასმელია, კეთდება ქერის ალაოსგან. სიმაგრისა და არომატისათვის ხარშვის დროს უკეთებენ სვეს.

ხაშლამა -  სანელებლებში და მწვანილებში მოხარშული ხორცი, რომელსაც სუფრაზე მიტანისას არომატისათვის ნედლ მწვანილს აყრიან.

ახმეტაში ჩამოსულ სტუმრებს უმასპინძლდებიან ქვევრში დაყენებული ღვინით. ქვევრი უნიკალური ნივთია და მასში დაყენებულ ღვინოს განსაკუთრებული არომატი აქვს. სახლის პირობებში დამზადებული სასმელის გარდა, სტუმრებს საშუალება აქვთ დააგემოვნონ ქარხნული წესით დამზადებული ღვინო, რომელსაც აწარმოებენ მუნიციპალიტეტში არსებული ღვინის ქარხნები.